EV a zo bet graet ganto hiriv an deiz ouzhpenn 1000 abadenn e Breizh, e Bro C'hall hag e peurrest Europa. Ur bern pladennoù studio a zo bet enrollet endeo ganto, mui unan ouzhpenn war al leurenn hag un dastumadeg eus o femp pladenn wellañ ivez, gant Gweltaz : gitar, bombard ha kan, Jari : gitar-boud ha kan, Fakir : synteoù, boest an diaoul ha kan ha Tof ouzh an taboulinoù. Goude disparti mantrus o zabouliner Harri e voe adkemeret ar bizhier gant Tof.
E penn ar strolladoù rock e Breizh, EV a zo bet krouet e deroù ar bloavezhioù '80 ha deut int da vezañ brudet er bloavezhioù '90. Abaoe, foetañ bro o deus graet, sonet o deus un tammig e pep lec'h ha kemeret perzh e meur a zastumadeg sonerezh rock ha keltiek.
Spered o fladenn nevez-embannet ''DIZEHAN'' a c'hlot mat gant spered ar strollad a-vremañ. Dizehan int bet war an hentoù, er studioioù, o krouiñ kanaouennoù abaoe un ugent a vloavezhioù.
DIZEHAN evel o fladennoù kent a zo bet kanet e brezhoneg, e galleg hag e finneg. (Mamm Jari a zo eus Bro-Suomi.) . Ar bladenn rock-mañ a zo dindan levezonoù breizhek ha keltiek, pinvidik a hesonioù efedus, gant diskanioù aes da zerc'hel soñj anezho ha luskoù leun a startijenn. Liesdoareoù ar c'hanaouennoù a c'hell bezañ displeget dre ar fed ma' z eus tri c'haner ha tri sonaozer war un dro gant pep a bersonelezh gwall-zisheñvel diouzh re ar re all.
Setu perak e kaver sonerezhioù ur rock gouez betek kavout tonioù tostoc'h ouzh an hengoun hag ar sonerezh da zañsal gant bombard ha boest an diaoul. Da lâret eo, kemmoù zo e aergelc'hioù a-wezhioù tomm ha reuziek hag a-wezhioù du ha trist met ivez laouen pe velkonius.
Ar meskaj soutil-se a ra ar pezh a zo eus EV hiriv an deiz, da lâret eo ur strollad birvidig war al leurenn gant sonioù personel-tre hag efedus, leun a startijenn ha tost-kar bepred ouzh o arvesterien.
Distruj - 1992
Reuz - 1994
Huchal - 1996
Mar Plij - live - 1998
Pemp - 2001
L'essentiel (Best Of) - 2002
Dizehan - 2004Skrivet gant Paul Bolton
